Асоцијациите и коморите од Србија, Босна и Херцеговина и Македонија, како и претставници од Молдавија и Турција, во Белград, се сретнаа да ги договорат чекорите кои сите ќе ги спроведуваат во сопствените држави, но и заедно ќе се обратат пред надлежни органи во ЕУ, за да се овозможи подршка за изземање на возачите од броењето на деновите на престој на територија на Шенген зоната (90/180), по примерот на железничкиот, авио и бродскиот превоз. Дел од дописот кој ќе се доставува до надлежните орган во ЕУ и во секоја држава пооделно, а ќе биде потпишан од сите држави присутни на средбата во Белград, се однесува на заштита на правота за работа и право на водење нормален живот на возачите, вели за „Слободен печат“, Билјана Муратовска, генерална секретарка на Асоцијацијата „Макам Транс“.

-Секојдневните апсења на професионални возачи при извршување на работните задачи, нивниот третман како сторители на кривични дела и флагрантните забрани на тие возачи за влез на територијата на Шенген земјите во период од неколку месеци до неколку години, се напад на хуманоста и достоинството на овие луѓе кои не превезуваат сопствена стока, туку стока на компании од земјите на ЕУ.

Ако на возачот му е забранет влез на Шенген територијата, а го издржува своето семејство управувајќи возило низ цела Европа и секако на териториите на земјите од Шенген, тој возач е лишен од правото на работа и правото на нормален живот. Замислете низ какви перипетии пминуваат возачите на кои им е забранет влез на Шенген територијата (затоа што останале таму возејќи камион повеќе од 90 дена во период од 180 дена)? Со ова се прекршуваат основните човекови права и принципи дадени со Европската конвенција за човекови права – објаснува Муратовска.

Во периодот од кога започна целиот процес (октомври 2024-та) на новиот начин на евидентирање на деновите на престој, „Макам Транс“ доставил дописи до Влада, МНРТ, МТ и Амбасадата на ЕУ во Македонија, како и до Транпортната заедница со седиште во Београд, но се уште нема никаков официјален одговор.

-Кој и зошто не ги внесе професионалните возачи од земјите кои не се членки на ЕУ во Регулативата 2016/399 член 6а, став (3) точка (e), каде од обврската за броење на деновите на престој во Шенген зоната се ослободени сите други екипажи кои вршат превоз на стока и патници, останува да се шпекулира – додава Муратовска.

Според неа, од 2015 година па досега, постојано се зголемува потребата од возачи во земјите на ЕУ, затоа што над 2 милиони европски возачи ќе се пензионираат заклучно со 2026 година.

-И наместо олеснување, некој одлучил да ги привлече возачите од Балканот и другите држави кои не се членки на ЕУ со зголемување на проблемите кои ги имаат при вршење на работни задачи (чекање на граница за влез во ЕУ, депортирање од државите ако имаат надминато 90 дена во 180 дена и примена на многу други не стандардни мерки) – реагира Муратовска.

Воведувањето на ЕЕС системот ќе уништи превозниците

Со воведувањето на ЕЕС (Eнтри – Eгзит Систем), македонските превозници, но и од сите трети земји кои не се членки на ЕУ ќе останат без професионални возачи.

-Време е надлежните органи од сите држави кои не се членки на ЕУ да се здружат и заедно да се изборат за укинување на дискриминацијата која се прави кон професионалните возачи кои вршат превоз во патниот сообраќај. Доколку не постигнат позитивни резултати, цените за превоз на стоките енормно ќе пораснат затоа што истиот ќе го вршат странски превозници од ЕУ со наши возачи, а со тоа и така големата инфлација ќе биде уште поголема, особено што имаме увозно зависна економија – предупредува Муратовска.