Центарот за управување со кризи (ЦУК) денеска ја продолжува потрагата по исчезнатото 16-годишно во водите на реката Вардар, кај селото Уланци близу Градско.

Девојчето исчезна вчера, по што започна голема потрага со полициски чамци, спасувачи и кучиња-трагачи.

„Дежурниот оперативен центар на ЦУК е известен дека екипите кои вршеа претрага ќе се повлечат поради немање минимум соодветни услови за претрага во ноќни услови. Утре рано наутро, екипите во взаемна меѓусебна координација ќе продолжат со потрагата“, информираше вчера ЦУК.

Инцидентот бил пријавен вчера попладне во СВР Велес – две девојки, едно на возраст од 16, а другото од 26 години, потонале во водите на Вардар кај селото Уланци, општина Градско.

По пристигнување на местото, 26-годишната девојка е пронајдена жива, а по 16-годишното девојче сè уште се трага, соопштија од СВР Велес.