Една од најпознатите компании за видеоигри во светот, „Електроник артс“ (ЕА) објави дека постигнала договор за продажба на сите јавно тргувани акции на конзорциум, од страна на три компании, пренесе Би-би-си.

Трите компании ќе купат 100% од акциите на EA, а за тоа ќе платат 55 милијарди долари, и тоа во кеш. Ова е најголемото вакво преземање во гејминг-индустријата досега.

Акционерите ќе добијат по 210 долари по акција, што е 25% повеќе од моменталната пазарна вредност од 168,32 долари од 25 септември, додека највисоката достигната цена е од 14 август годинава и таа изнесувала 179 долари по акција.

Конзорциумот е составен од државниот инвестициски фонд на Саудиска Арабија (ПИФ), „Силвер лејк“, како и од компанијата „Афинити партнерс“, основана од зетот на американскиот претседател Доналд Трамп, Џаред Кушнер.

ПИФ веќе имаше удел од 9,9% во акциите на ЕА.

На почеток нема да има некои посебни промени во функционирањето на компанијата, а неа ќе продолжи да ја води актуелниот директор и претседател на одборот, Ендру Вилсон.