Животот навистина може да биде беспрекорно „вкусен“, а тоа го потврдува и Дијана Иваноска од Тетово, која со својот талент за комбинација на вкусови нè носи на едно исклучително гастрономско патување.

Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.

„Го сакам секој дел од процесот, но најмногу уживам во фотографирањето на храната“, ни открива Дијана.

Инвентивната Дијана денеска споделува рецепт за празнично гастрономско уживање – Штолен леб (Stollen).

Штолен е традиционален германски леб кој се подготвува во претстојниот празничен период. Штолен е благо лепче полно со суви овошја, кандирана кора од цитруси, јатки и ароматични зимски зачини. Го има да се купи по маркетите кај нас, но ако имате време и желба, обидете се да го направите. Домашен е многу повкусен.

Состојки:

– 150 мл млеко млако
– 1 ќесичка сув квасец (7 грама)
– 415 г брашно
– 100 г шеќер
– 1 лажиче сол
– 1 лажиче цимет
– 1/4 лажиче морско оревче
– 1/2 лажиче кардамом (јас не најдов)
– 150 гр путер (омекнат)
– 2 жолчки
– 200 г суво грозје (или микс од суво грозје, брусница) потопени во малку рум преку ноќ. (Ако не сакате да користите алкохол може да се потопат во сок од портокал)
– 100 г кандирана кора од цитруси или изрендајте кора од лимон и портокал. (Јас користев кандирана кора од портокал и лимон што ја подготвив порано)
– 50 г бадеми, сечкани
——–
– Путер стопен за премачкување
– Шеќер во прав за посипување

Подготовка:

Во садот со млекото додадете го квасецот и 2 лажичиња од шеќерот. Промешајте и оставете да се активира квасецот.

Во длабок сад измешајте го брашното, шеќерот, путерот, жолчките, солта и зачините. Додадете го млекото со квасецот и замесете тесто. Месете додека добиете мазно тесто. Оставете го на топло да стаса во длабок сад лесно премачкан со масло.

Стасаното тесто расплескајте го со раце на работната површина. Ставете го одозгора прецеденото сувo овошје, кората од портокал и лимон и бадемите. Измесете кратко додека се распределат состојките низ тестото.

Поделете го тестото на два дела за да добиете две векни леб.

Развлечете правоаголна кора од тестото. Едниот дел превиткајте го до половина, вториот дел превиткајте го преку првиот дел. Внатре може да ставите марципан. (опционално). Јас во едната векна ставив, а во другата не. Купив марципан топчиња една ќесичка и ги измесив во долгнавеста форма. Го ставив по должина на средина на векната. Превкусен е и без марципан.
Векните, покриени со проѕирна фолија, оставете ги на топло да стасаат.

Загрејте ја рерната на 160 степени Целзиусови.

Пред да ги ставите да се печат, отстранете ги сувите овошја што ѕиркаат на површината, за да не изгорат додека се печат.