Уапсени се двајца скопјани, осомничени дека ноќеска запалиле две товарни и едно патничко возило на паркинг пред Спротскиот центар „Јане Сандански“ во Аеродром, соопшти МВР.

Двете комбиња биле сопственост на приватна фирма од Скопје, а колата на приватно лице од Прилеп.

„На 08.10.2025 во 02:20 часот во СВР Скопје е пријавено дека на паркинг простор од Спортскиот центар „Јане Сандански“ на подрачје на општина Аеродром во Скопје биле опожарени товарно возило „ивеко“ со скопски регистарски ознаки и товарно возило „рено“ со скопски регистарски ознаки, двете сопственост на правно лице од Скопје и патничко возило „опел“ со прилепски регистарски ознаки, сопственост на Е.С. од Прилеп.

Во 02:50 часот пожарот бил изгаснат од екипа на Бригадата за противпожарна заштита Скопје, а по преземени мерки и активности на полициски службеници од Полициската станица Аеродром и Единицата за интервентна полиција при СВР Скопје, поради сомнение дека го предизвикале пожарот, на бул.АСНОМ од слобода се лишени Ф.Ц.(23) и И.Ц.(24), двајцата од Скопје“, соопшти МВР.

Тие се задржани во полициска станица за понатамошна постапка.