Нема човек кој не доживеал болка и нарушувања во абдоминалната област: грчеви, печење, гадење… За среќа, во повеќето случаи, сè се смирува по земање лекови, празнење на цревата или повраќање, или можеби само од себе, но има случаи кога абдоминалната болка може да биде загрижувачка.

1. Остра, прободувачка болка

Ако почувствувате ненадејна остра, прободувачка болка во абдоменот, треба што поскоро да одите на лекар. Таквата болка, која е концентрирана во еден фокус и која би ја оцениле како шест или повеќе на скалата на болка до десет, може да биде поврзана со пептичен улкус (чир).

– Ако имате болка во десниот долен дел од стомакот или болката се движи од пределот околу папокот кон десниот долен дел од стомакот, ова може да укажува на акутно воспаление на слепото цревос – изјави д-р Жан-Пјер Рауфман, гастроентеролог и раководител на Одделот за гастроентерологија и хепатологија при Медицинскиот центар на Универзитетот во Мериленд. – Поради овој вид болка, треба да реагирате што е можно поскоро, бидејќи веројатно ќе биде потребен специфичен третман или операција.

2. Постојани, пулсирачки болки

Постојаната пулсирачка болка може да биде знак на повреда на мускулите или посериозна повреда на органи, вклучувајќи воспаление на слепото црево, панкреатитис, хернија итн.

– Точната локација на болката може да укаже на тоа кои органи се зафатени, но болката често може да мигрира и да се шири, па затоа е важно да се побара медицинска помош за да се препознае причината за болката – вели д-р Финали Пател, гастроентеролог во методистичката болница во Хјустон.

3. Болка во горниот десен квадрант

Доколку почувствувате силна болка во горниот десен квадрант на абдоменот, ова може да биде причина за загриженост и посета на лекар. Како што вели д-р Рауфман, болката во горниот десен дел од абдоменот може да укажува на болест на жолчното кесе, можеби од жолчни камења.

4. Силна болка во долниот дел на стомакот

Доколку чувствувате силни болки во долните квадранти на абдоменот кои не престануваат, остри се и неподносливи, ова може да биде причина да посетите доктор.

– Сите болки во долниот дел од стомакот не се сериозни, но важно е да се открие нивната причина – вели д-р Даглас Спрунг, гастроентеролог од клиниката „The Gastroenterology Group“. – Можат да потекнуваат од воспаление на слепото црево, кога најчесто се изразени во десниот долен квадрант, или од дивертикулитис, кога најчесто се јавуваат во левиот долен квадрант на абдоменот.

5. Болка и чувствителност на допир

Ако, покрај болката, стомакот е осетлив на допир и станува тврд, ова е аларм и веднаш треба да се јавите во итна помош, бидејќи може да станува збор за воспаление на слепото црево. Ќе биде придружено со висока телесна температура и повраќање, рече д-р Рауфман.

6. Болки и крварење

Доколку абдоминалната болка е поврзана со ректално крварење или повраќање на крв, или со силна абдоминална болка, лицето има висока температура, се поти и се тресе, треба да се повика итна помош без одлагање, истакнува д-р Спрунг. Станува збор за внатрешно крварење, а една од причините може да биде руптура на езофагеалните варикси кај портална хипертензија, која се јавува како компликација на цироза на црниот дроб.