Претседателот на Црна Гора, Јаков Милатовиќ, на 9 и 10 јули ќе престојува во официјална посета на Србија, при што ќе се сретне со претседателот на Србија, Александар Вучиќ и со претседателот на Народното собрание, Владимир Орлиќ, јавува РТС.

Како што соопштија од Кабинетот на црногорскиот претседател, планирано е Милатовиќ со воени почести да положи венец на Споменикот на непознатиот херој во Авала, како и да положи цвеќе пред ОУ „Владислав Рибникар“.

Во чест на посетата на претседателот Милатовиќ, Амбасадата на Црна Гора ќе приреди и свечен прием во Црногорската куќа во Белград.

Посетата на Милатовиќ на Србија е прва по официјалните посети на Брисел и институциите на Европската унија и НАТО, а, како што рече претходно, целта е зајакнување на политичките и економските односи меѓу двете земји и подобрување на регионалната соработка, се додава во соопштението. .