Британското здружение на кинематографери (BSC) ја додели својата специјална награда за достигнување (Special Achievement Award) на интернационалниот фестивал на филмска камера „Браќа Манаки“.

Како најстар фестивал во светот посветен исклучиво на кинематограферите, интернационалниот фестивал на филмска камера „Браќа Манаки“ го носи наследството на Јанаки и Милтон Манаки, првите филмски хроничари на Балканот, чие дело ги постави темелите на визуелното раскажување во регионот.

Британското здружение на кинематографери, едно од најголемите и најзначајни професионални здруженија во светската филмска индустрија ја доделува својата награда како признание за поединци или групи на поединци што посветено ја слават кинематографијата и придонесуваат за нејзината афирмација.

Во образложението на Британското здружение на кинематографери (BSC) се истакнува дека фестивалот „Браќа Манаки“ не само што ја негува оваа уметничка форма, туку и претставува платформа за нови генерации на кинематографери, кои со својата визија ја обликуваат иднината на светската кинематографија.

– Филмскиот фестивал „Браќа Манаки“ е најстариот фестивал посветен на кинематографијата во светот. Основан во 1979 година, фестивалот го доби името на двајцата пионери на кинематографијата, Јанаки и Милтон Манаки. Со осамостојувањето на Македонија во 1991 година, фестивалот стана меѓународен филмски фестивал, славејќи ја светската кинематографија и истакнувајќи ги новите таленти и пред и зад камерата. Сместен е на Балканот, во шармантниот македонски град Битола (градот на браќата Манаки), град кој е уметнички и креативен центар на фестивалот. Одборот на гувернери на Британското здружение на кинематографери ја доделува оваа награда како признание за посветеноста на фестивалот да го прослават занаетот на кинематографијата и неговата страст за прикажување разновиден спектар на фикција, документарни и кратки филмови од целиот свет – стои во образложението на Британското здружение на кинематографери.

Битола, како место во кое живееле браќата Манаки, повеќе од еден век е симбол на визуелната уметност и дом на фестивалот „Браќа Манаки“. Прекрасна коинциденција е што токму во Лондон, градот од каде што браќата Манаки ја набавиле својата легендарна камера „Урбан Биоскоп“ произведена со сериски број 300, фестивалот што го носи нивното име добива вакво признание.

– Битола е нашата вечна инспирација, градот каде што светлината и сенките танцуваат во хармонија создавајќи приказни што го надминуваат времето. Лондон, пак, е местото каде што нашите предци ја пронајдоа алатката за оваа магија – нивната камера „Урбан Биоскоп 300“. Денес со ова признание се затвора кругот меѓу двата града поврзани преку љубовта кон филмот и уметноста на кинематографијата – истакнува директорот на ИФФК „Браќа Манаки“, Симеон Мони Дамевски.

Признанието доаѓа како потврда дека филмската уметност е жива, дека моќта на еден кадар е безвременска, дека светлината на кинематографијата секогаш го наоѓа својот пат, а тие што вредно работат за светот соодветно да ги чествува големите скриени мајстори без кои таа уметност не би постоела, не остануваат незабележани и се почитуваат како најголеми пријатели.

На церемонијата што се одржа на 1 февруари во Лондон беа доделени годишните награди на BSC за животно дело, за кинематографери на студентски, краткометражни и долгометражни филмови, серии и технолошки достигнувања. Настанот е еден вид британски Оскари за луѓе од кинематограферската и сродните професии.

Специјалната награда претставува исклучителна чест за фестивалот во Битола, кој веќе четири и пол децении ја слави уметноста на кинематограферите и ја истакнува нивната клучна улога во создавањето на филмската магија.