Во рамки на „Денови на македонски кореографи“, кои се во организација на Националната опера и балет и со поддршка на Министерството за култура и туризам, на 24 април, во 20 часот, на Малата сцена на НОБ ќе се одржи премиерата на претставата „Д (како Дездемона)“ во кореографија на Рисима Рисимкин, која година одбележува 45 години уметничко творење.

Во претставата настапуваат првенците на Скопје танцовиот театар, Адријана Данчевска и Дејан Битровски, како и солистите Сара Димовска, Лука Ѓорѓиев, Давор Милев, Надја Луканова, Елена Терзиева и Ивона Маневска. Музиката е на композиторот Тони Китановски, костимите на Благој Мицевски, сценскиот дизајн на Матеа Мијановиќ, светло-дизајнот е на Милчо Александров.

Претставата е инспирирана од трагедијата „Отело“ на Вилијам Шекспир. Рисима Рисимкин продолжува со истражувањето на творештвото на овој извонреден драмски автор, со посебен акцент на женските ликови во неговите дела. По „Лејди Магбет“, ова е втора претстава која е базирана на женски лик од делата на Шекспир, односно втор дел од трилогијата „Жените во делата на Шекспир“, која оваа кореографка ја работи со современ танцов израз.

– Шекспир е мајстор на зборот, и јас сум голем почитувач на неговото творештво. Посебно ме инспирира можноста тоа мајсторство од збор, да го пренесам преку движење на сцената и да допрам до публиката со една поинаква, современа естетика. Голема благодарност до генералниот директор на НОБ, Оливер Арсовски, уметничкиот раководител на Балетот, Марија Кичевска и менаџерот Кире Павлов за оваа иницијатива на првите „Денови на македонски кореографи“ – вели Рисимкин.

Претставата „Д (како Дездемона)“ е во продукција на Скопје танцовиот театар, чија работа е поддржана од Министерството за култура и туризам, а се изведува во соработка со Националната опера и балет.