Шведскиот диџеј Авичи, чие вистинско име е Тим Берглинг, почина во 2018 година и остана запаметен како еден од првите музичари што ја подигна електронската денс музика со глобален успех.

Во новиот документарен филм „Јас сум Тим“ се покажува како Авичи се борел со зависноста од лекови против болки кон крајот на својот живот и дека изгледал како „зомби“, пишува „Дејли мејл“.

Водел тешка битка со зависноста од таблети и анксиозноста што никогаш не можел да ја надмине. Како што пишуваат странските медиуми, тој порано бил толку лош што очите му изгледале „како иглички“, а тоа го потврдил и Џеси Вејтс, кој му станал како постар брат.

Во документарецот, тој опишал како за време на една вечера Авичи „не бил присутен“, иако очите му биле „широко отворени“. Филмот ја имаше светската премиера на Филмскиот фестивал Трибека во неделата.

Филмот го прикажува самиот Авичи, а е заснован на интервју кое го дал на крајот од кариерата. Тој страдал и од анксиозност и депресија, но морал постојано да работи.

„Сè уште бев вознемирен, но сепак почнав да настапувам“, рекол тој.

Кога во 2015 година го снимил својот втор албум и продолжил да настапува, Швеѓанецот повеќе немал сили да продолжи. Ги откажал сите настапи и се концентрирал на создавање на албумот „Приказни“. Неговите колеги сфатиле дека неговите текстови се повик за помош.

Иако тој исто така започнал со терапија за анксиозност, неговите пријатели рекоа дека враќањето на турнејата може да го дотолчи.

„Сè ми стана премногу. Не верував дека можам да успорам и да го сменам начинот на кој настапував. Видов како другите ги прават истите работи како мене и не им пречеше. Почнав да лудувам“, му рекол еднаш  Авичи и додал дека мислел дека има сè што му треба на овој свет за да биде среќен, но не било така.

Набргу потоа се повлекол од сцената и ја прекинал соработката со својот менаџер Араш Пурнури. Еден месец по неговото повлекување, Авичи рекол дека се чувствува како да има 18 години, но две години подоцна си го одзеде животот.

По неговата прерана смрт, семејството на Авичи ја основа Фондацијата „Тим Берглинг“, за да го почитува животот и наследството на покојниот музички продуцент и да ја промовира свеста за менталното здравје, особено кај младите луѓе.