Официјални лица на Лос Анџелес го блокираа уништувањето на имотот каде што почина филмската ѕвезда Мерлин Монро бидејќи го сметаат за историско наследство.

Последниот дом на Мерлин Монро и единствената резиденција што некогаш ја поседувала самостојно, засега нема да биде срушена, откако претставниците на Лос Анџелес интервенирале за да го блокираат уривањето на имотот, пишува „Гардијан“ (Тhe Guardian).

Веста дека новите сопственици на 12305 Fifth Helena Drive, каде што Монро почина на 36-годишна возраст, поднеле барање за дозвола за уривање, предизвика бес кај пошироката јавност. Градската советничка на Лос Анџелес, Траси Парк, изјави дека добила стотици повици со кои ја повикувале да ја спаси куќата во шпански колонијален стил во населбата Брентвуд во градот.

„За жал, Одделот за градежништво и безбедност издаде дозвола за уривање пред јас и мојот тим да можеме целосно да интервенираме и да го решиме ова прашање“, рече Парк на прес- конференција минатата недела, додавајќи дека има потреба од „итна акција“.

Парк поднела предлог за разгледување на имотот како историско наследство, а советот едногласно гласал да се продолжи со оваа иницијатива, поради што градскиот оддел за градење ја отповикал дозволата за уривање. Ова исто така, спречува какви било големи измени на имотот додека градот го разгледува потенцијалниот статус на историско обележје.

„Ова ќе биде првиот чекор за да се осигураме дека можеме да го заштитиме овој дом од уривање“, изјавила Парк.

Не е јасно што мистериозниот нов сопственик има намера да прави со имотот. Сопственикот не доставил никакви планови во кои се наведени какви се нивните планови за земјиштето, изјавила Парк на минатонеделната прес-конференција.

Монро ја купила еднокатна куќа од 270 квадратни метри во раните 1960-ти за 75.000 долари по крајот на нејзиниот трет брак со драматургот Артур Милер. Тоа била единствената резиденција на актерката, која дел од своето детство го поминала во сиропиталиште.

Легендарната актерка, ѕвезда на филмовите како „Gentlemen Prefer Blondes“, „Some Like It Hot“ и „The Misfits“ беше пронајдена мртва во спалната соба во домот во август 1962 година.
Монро го нарекла домот „Cursum Perficio“, латинска фраза што значи „Моето патување завршува тука“, фраза која го краси предниот трем на домот.