Светската поп-дива Витни Хјустон, поради дрогата и насилството што го трпеше во бракот, на 11 февруари 2012 година од врвот на светот отиде во прегратката на смртта.

Во 1992 година Витни Хјустон беше на врвот на нејзината кариера, но нејзиниот живот од тој момент почнува да излегува од контрола. Истата година пејачката се вљубила во пејачот Боби Браун. На почетокот уживале во бракот, во љубовта и страста, но набрзо нивниот однос се сменил и тоа поради неконтролираната употреба на дрога. Полицијата многупати требало да ги разрешува кавгите, тепачките и непримерното однесување на сопружниците. Витни неколкупати го пријавувала Боби во полиција, тврдејќи дека ја тепал. Но подоцна ги отфрлала тужбите и му се враќала велејќи дека не може да живее без него.

Во 2010 година во интервјуто на Опра Винфри Витни јавно призна дека Браун ја тепал, поради што во 1993 година поднесе тужба против него.

И покрај проблемите, Витни продолжи да напредува во кариерата. Ја одигра главната улога во филмот „Телохранител“, кој доживеа голем успех, а саундтракот од филмот е еден од најпродаваните на сите времиња. Песната „I Will Always Love You“ беше и остана нејзиниот најголем хит.

На 3 март 1993 година Витни ја роди ќерката Боби Кристина.

Кон крајот на 1999 и почетокот на 2000 година бракот на Витни и Боби беше тема на таблоидите, а по неколку откажани концерти пејачката неколку месеци се скри од очите на јавноста. Нејзиното прво појавување беше кај познатата водителка Дајен Сојер во 2002 година, каде што Витни се појави очигледно под влијание на дрога и во многу лоша состојба. Се шпекулираше дека доживеала нервен слом.

Следните неколку години Витни се обидуваше да го зачува својот брак и да се излекува од зависноста.

Во 2007 година повторно направи пауза во кариерата и се разведе од Боби Браун, а на суд доби старателство над нивната ќерка Боби Кристина Хјустон Браун.

После цела деценија измачување, Витни повторно почна да наликува на себеси и во 2009 година го издаде новиот албум „I Look at You“.

„Песните сами ќе ви објаснат и ќе сфатите каде сум, и за промените низ кои поминав за да стигнам до овде“, рече во една прилика.

На почетокот на 2012 година почнаа да кружат гласини дека Витни има финансиски проблеми, кои таа брзо ги негираше.

Почина на 48-годишна возраст на 11 февруари 2012 година во Лос Анџелес, една вечер пред доделувањето на Греми наградите на кои била поканета.

Нејзиното тело беше пронајдено во бањата во хотелска соба во хотелот „Хилтон“ на Беверли Хилс.

Досега како официјална причина за смртта е забележено давење во када со врела вода поради откажување на срцето, предизвикано од предозирање.

Нејзината ќерка Боби Кристина во 2015 година помина 6 месеци во вештачка кома откако е најдена во бесвесна состојба во кадата бидејќи се предозирала со опојни супстанции.

Според податоците од Гинисовата книга на рекорди, Витни Хјустон е женски изведувач со најмногу награди. На списокот на нејзините награди се наоѓаат 415 признанија, а таа е истовремено и една од најтиражните пејачки, која продала повеќе од 200 милиони албуми и синглови ширум светот.

За нумерата „When You Believe“ за цртаниот филм „Принцот на Египет“, заедно со Мараја Кери добија Оскар за најдобра песна таа година.