Во еден луксузен ресторан во Москва, гостите во коктел фустани и скапи костуми се забавувале цела ноќ по повод 70-тиот роденден на Стивен Сегал, актерот роден во Америка, најпознат по тоа што игра улоги на цинични полицајци и командоси во акционите филмови, пишува „Гардијан“.

„Секој еден од вас, вие сте моето семејство и моите пријатели. Ве сакам сите вас“, гласела здравицата на Сегал, облечен во широка црна кошула.

На масата до Сегал седеле некои од водечките руски поддржувачи на Кремљ, вклучително и главната уредничка на државната информативна мрежа „РТ“, Маргарита Симонјан и Владимир Соловиев, еден од најозлогласените пропагандисти во земјата, кој ги преведувал зборовите на Сегал на руски.

 

View this post on Instagram

 

A post shared by Steven Seagal (@seagalofficial)

Актерот, кој самиот се нарекува будист, долго време има блиски односи со рускиот претседател Владимир Путин и доби руско државјанство во 2016 година. Тој претходно ја нарече анексијата на Крим од страна на Путин „многу разумна“ и го опиша претседателот како „еден од најголемите живи лидери во светот“. Од почетокот на руската инвазија на Украина, тој ја удвои својата поддршка за Путин, велејќи во едно неодамнешно интервју дека „надворешен ентитет“ е виновен за спротивставувањето на двете земји.

Кремљ и медиумите контролирани од државата со децении ги негуваа пријателствата на Путин со познати личности од запад, како што е Сeгал, во обид да се зајакне неговиот имиџ дома и во странство.

„Главната цел на сето ова беше да се покаже дека општествениот модел на земјата е привлечен за аутсајдерите“, вели Марк Галеоти, автор на книгата „Треба да зборуваме за Путин“ и виш соработник на „Royal United Services Insitute“.

Сепак, бројот на западни ѕвезди и политичари кои, како Сегал, сè уште се подготвени да поминат „преку сè“ со Путин драстично се намали во текот на изминатиот месец, при што многумина решија да се дистанцираат од земјата која е обвинета за бројни злосторства за време на инвазијата на Украина.

Еден од првите пријатели на Путин што ги осуди постапките на Русија беше француската ѕвезда Жерар Депардје, кој ги осуди „лудите, неприфатливи ексцеси на лидерите како Владимир Путин“ во Украина.

Депардје, кој стекна глобално признание за неговите улоги во филмовите како „The Last Metro“ и „Jean de Florette“, стана руски државјанин во 2013 година, откако ја критикуваше француската влада поради даночната политика.

Актерот Жерар Депардје кој е близок со Путин порача: Оставете го оружјето и преговарајте

Во писмото до руската државна телевизија во тоа време, Депардје изјави дека го обожава претседателот Владимир Путин, и дека таа љубов и почит е обострана. Имено, Путин таа година лично му додели руско државјанство на Депардје на специјална вечера на која двајцата беа сликани како се прегрнуваат.

Зборувајќи за агенцијата „France-Presse“ во март, Депардје, кој моментално се соочува со обвиненија за сексуално злоставување во Франција, ја повика Русија „да ги запре нападите и да преговара“.

Коментарите на Депардје беа дочекани со гнев во Русија, при што портпаролот на Путин, Дмитриј Песков, рече дека актерот „не ја разбира целосно“ ситуацијата во Украина. Некои руски претставници го повикаа Путин да му го одземе руското државјанство на славниот актер.

Критиките за дејствијата на Русија од ден за ден се повеќе се зголемуваат особено откако се појавија извештаите кои прикажуваа телат на мажи во цивилна облека кои лежат и се распаѓаат на улиците на Буча, надвор од Киев, што е доказ за целосниот обем на злосторствата што се верува дека руските сили ги извршиле во Украина.

Во саботата, поранешниот италијански премиер Силвио Берлускони призна дека е „длабоко разочаран и тажен“ од однесувањето на рускиот лидер. Берлускони, за кој се смета дека е обожавател на „мачо стилот“ на владеење на Путин, во 2014 година славно ги посети лозјата во Крим заедно со рускиот лидер веднаш откако Москва анектираше полуостровот.

Милијардерот сега изјави дека Русија е одговорна за „ужасот од масакрите на цивилите во Буча и други места“, жестоко осудувајќи ги воените злосторства.

Набргу откако Русија го започна нападот врз Украина, американскиот филмски режисер Оливер Стоун, кој ги бранеше акциите на Крим во неговите документарни филмови и во 2017 година спроведе серија интервјуа со рускиот лидер, на „Твитер“ напиша дека „агресијата на Путин во Украина“ е „грешка“.

„Иако САД има многу војни на агресија, тоа не ја оправдува агресијата на г-дин Путин во Украина. Русија згреши што изврши инвазија“, истакна тој.