Повремен македонски репрезентативец уапсен во Хрватска, претепал човек за паркинг место
Поранешниот македонски репрезентативец, Музафер Ејупи кој моментно настапува за Славен Белупо, е уапсен во Копривница, Хрватска, откако со уште еден пријател му нанеле тешки телесни повреди на локален жител.
Според полицијата, причина за тепачката и подоцнешното апсење на Ејупи и на неговиот пријател е кавгата за место за паркирање.
„На 25. септември во 19:40 часот на улицата „Антун Немчиќ“ во Копривница, дошло до физичка пресметка меѓу три лица на возраст од 52, 32 и 31 година. 53-годишното лице се здобило со тешки телесни повреди, а другите двајца со лесни повреди. Две лица се приведени и се истражува случајот“, стои во полицискиот извештај.
Музафер Ејупи е повремен член на фудбалската селекција на Македонија и има настапувано за Вардар, а во хрватскиот шампионат е од 2015 година каде освен за Славен Белупо играл и за Осиек.