Ден пред седницата на Народното собрание на Република Српска, контроверзниот Закон за заштита на уставниот поредок на Република Српска беше повлечен од парламентарна процедура, пренесува „Радио Сараево“.

Шефот на Клубот на пратеници на СНСД во Народното собрание на Република Српска, Срѓан Мазалица, објави на социјалната мрежа X дека законот е повлечен од понатамошна постапка.

„Како претставник на предлагачите, ја информирам јавноста дека го повлекуваме Законот за заштита на уставниот поредок од постапката. Очекувавме поддршка од опозицијата, бидејќи тие побараа и гонење на некои кривични дела, но бидејќи не ја разбраа суштината, ги покануваме заедно да напишат и предложат нов закон“, рече Мазалица.

Ова е предлог што предизвика многу контроверзии, бидејќи предвидуваше формирање на Специјален суд на РС, Специјално обвинителство на РС и Служба за заштита на уставниот поредок на РС.

Опозицијата претходно предупреди дека усвојувањето на овој закон ќе значи воведување на шпионско-полициска контрола врз критичарите на режимот и можност за брзо притворање на секој што не ги сака властите.