Бројот на официјално регистрирани невработени во Украина од 1 август достигна 112.300. Од почетокот на годината, Државната служба за вработување им помогнала на речиси 127.000 Украинци да најдат работа, покажуваат официјалните податоци на таа служба, пренесува Укринформ, објави Политика рс.

„Заклучно со 1 август 2023 година, 112.300 лица имале статус на невработени. Во вкупниот број регистрирани невработени, 31.800 лица (28 отсто) се мажи, 80.500 лица (72 отсто) се жени“, се наведува во извештајот.

Најголем дел од невработените е забележан кај лицата на возраст од 35 до 44 години и од 45 до 55 години – по 29 отсто. Огромното мнозинство од невработените (43 отсто) се со високо образование, уште 36 отсто се со стручно и техничко образование, пренесува Танјуг.

Според податоците на Заводот за вработување, услугите на нејзините структурни одделенија во периодот јануари-јули 2023 година ги користеле 481.800 лица, од кои 370.700 евидентирани невработени. Забележано е дека 235.900 луѓе во Украина добиле надоместок за невработеност.

Со помош на центрите за вработување, во периодот јануари-јули 2023 година, работа нашле 126.900 лица, од кои 91.300 евидентирани невработени.

Како што беше соопштено, Државниот завод за вработување веќе има издадено речиси 44.000 упати за ангажирање лица на општествено корисни работни места, а за нивно спроведување се издвоени околу 7,5 милиони евра.