Канје Вест е во центарот на сериозни правни проблеми откако група поранешни вработени поднеле тужба во која го обвинуваат него, компанијата „Јизи Ел-ел-си“ (Yeezy LLC) и поранешниот шеф Мило Јанопулос за создавање токсична и експлоататорска работна средина.

Вработените бараат отштета од над 2 милиони долари. Според судските поднесоци, вработените велат дека биле ангажирани да работат на апликација за стриминг на музика наменета да го промовира претстојниот албум на Вест, „Vultures 2“.

Сепак, нивното работно искуство, наводно, се претворило во кошмар, со вознемирување, расна дискриминација и присилна изложеност на несоодветна содржина.

Тужбата вклучува изјави од повеќе лица, вклучително и малолетник, кој имал само 14 години кога почнал да работи со тимот на „Јизи“. Малолетникот тврди дека постојано го исмејувале поради возраста и дека бил изложен на расни навреди и коментари.

„Погрдните коментари и шеги беа насочени кон мене и кон другите“, рече тој.

Другите вработени ја повторија таа загриженост. Еден вработен Мајлс Џексон-Ли ја опиша работната атмосфера како „култ“, тврдејќи дека е поттикната од страв, стрес и конфузија.

Тој наведува и дека при групните разговори, вработените биле нарекувани „робови“.

„Стресните услови на работното место и финансиската експлоатација ми направија значителна емоционална и психолошка штета“, рекол Џексон-Ли во неговата изјава.