Јужноафриканскиот параолимпиец Оскар Писториус ќе биде пуштен на условна слобода откако помина речиси 10 години во затвор поради убиство на својата девојка. Одделот за условно ослободување по денешното рочиште соопшти дека 37-годишниот Писториус ќе биде ослободен на 5 јануари 2024 година.

На 14 февруари 2013 година, во својот дом во Преторија, Писториус ја застрелал својата девојка Рива Стенкамп низ затворена врата од бањата, бидејќи мислел дека има провалник во куќата. Обвинителите тврдеа дека 29-годишната манекенка и реалити ѕвезда по расправија втрчала во бањата, а Писториус ја убил во напад на бес.

Тој првично беше осуден за убиство од небрежност и доби петгодишна затворска казна, но подоцна Апелациониот суд ја укина пресудата и го осуди за убиство. Тој првично беше осуден на шест години затвор, но по жалба на обвинителството беше осуден на 13 години и пет месеци затвор.

Писториус упати четири куршуми во Рива Стенкамп, а како отежителна околност судот го наведе фактот дека параолимпиецот не испукал предупредувачки истрел.

Тешките престапници во Јужна Африка мора да отслужат најмалку половина од казната за да добијат право на условно ослободување, што го направи Писториус.