Рајан Рејнолдс и Блејк Лајвли ќе ги „прескокнат“ годинашните Златни глобуси. Имено, двојката нема да присуствува на церемонијата на доделување награди на 5 јануари, поради правната битка на Лајвли со актерот и режисер Џастин Балдони од филмот „Ова завршува со нас“ (It Ends With Us), пренесува „Пипл“.

Рејнолдс (48) и неговиот колега од филмот на „Дедпул и Волверин“ (Deadpool & Wolverine), Хју Џекмен, се номинирани во категоријата филмски и благајнички достигнувања на овогодинашната церемонија. Џекмен (56) исто така нема да присуствува.

Извори изјавија дека одлуката на тројцата актери да не присуствуваат на церемонијата била донесена „добро однапред“ по поднесувањето на жалбата на Лајвли и тековната правна битка со Балдони.

Инаку, Лајвли поднесе жалба против Балдони и неговите соработници, тврдејќи дека сексуално ја вознемирувал и спровел одмаздничка кампања за оцрнување на нејзиниот углед, во декември 2024 година.

Адвокатот на Балдони, Брајан Фридман, ги нарече тврдењата „лажни“, а актерот поднесе тужба од 250 милиони долари против „Њујорк Тајмс“ на 31 декември поради написот на весникот за жалбата на Лајвли.

Водителката на Златните глобуси, Ники Глејзер неодамна потврди дека нема да се шегува за правната пресметка на Лајвли со Балдони за време на церемонијата, ниту пак ќе ја споменува темата.

„Мислам дека работата на Блејк Лајвли-Џастин Балдони е толку жешка работа во моментов што дури и самото спомнување на тоа ќе изгледа дека би можела да бидам на погрешната страна на работите, иако никогаш не би била“, изјавила Глејзер.

Бара отштета од 250 милиони долари: Џастин Балдони го тужи „Њујорк тајмс“ за написот во кој Блејк Лајвли го обвини за „одмаздничка кампања“