Земјоделска површина во атарот на тетовско Раотинце, засадена претежно со пченица, пченка и луцерка ја уништи последната поплава, која минатата недела ја зафати Опшина Јегуновце, откако се излеа реката Вардар по интензивните врнежи од дожд.

Проценките на мештаните од село Раотинце се дека околу 100 декари ниви се под вода. Засаденото е уништено.

„Се надеваме дека ќе бидат наклонети временските услови и водата целосно ќе се повлече од нивите. Ќе треба да почекаме да се засуши земјата, па потоа ќе треба да ја изораме и да засадиме нови семиња и насади. Ќе бидеме во голем трошок, но, не смееме да ги оставиме нивите запустени во кал оти од нив живееме. Но, во случај ако и натаму продолжат врнежите, тогаш ништо од нивите, така ќе останат годинава необработени оти не можеш ништо да засадиш на поплавени и водени ниви“, вели Васко Јанчевски од месната заедница од село Раотинце.

Дел од земјоделската површина во Општина Јегуновце речиси секоја година се поплавува, поради излевање на реката Вардар чие корито не е регулирано. И од општинските и од централните власти, повеќе од две децении ветуваат дека ќе започнат со регулација на коритото на реката, за што веќе има изготвено проект, но градежни активности на терен нема.

Веќе сме дигнале раце од овој проект, велат мештаните.

„Секоја година особено пред избори, ветуваат дека ќе го регулираат коритото. Но, нема никакви активности како што гледате. Тоа е единствениот спас за заштита од поплави. На повеќе места кои што се ризични, треба да се изградат потпорни ѕидови кои ќе не заштитат од излевање на реката. Порано барем не обештетуваа, сега последниве неколку години трпиме големи штети, но нема никакво обесштетување“, вели Васко Јанчевски од месната заедница од село Раотинце.

Мали излевања минатата недела имаше и кај неколку канали за наводнување во тетовско.

ВИДЕО: Вардар се излеа и поплави ниви во Општина Јегуновце, водостојот на реките ризичен и во Тетово