Суд во јужноамериканската држава Боливија денеска издаде налог за апсење на поранешниот претседател на земјата, 65-годишниот Ево Моралес, откако тој по вторпат не се појавил пред судот поради наводна врска со малолетна девојка и вмешаност во трговија со луѓе.

„Издадена е потерница за негов претрес и апсење“, рече судијата Нелсон Рокабадо, според „Блумберг“.

Обвинителите поднесоа обвинение против Моралес во средината на декември, на што тој одговори тврдејќи дека тоа е стратегија за блокирање на неговата претседателска кандидатура, наведувајќи дека тој е „жртва на брутална судска војна“ организирана од Луис Арсе, актуелниот претседател на Боливија.

Моралес беше претседател на Боливија од 2006 до 2019 година и тој е првиот претседател на земјата што го претставувал домородното население.

За време на мандатот на Моралес, Боливија доживеа период на економски напредок и намалување на сиромаштијата, потсетува АП. Тој беше и жесток критичар на политиките на САД во латинска Америка, а како социјалист, често беше мета на критики од американските власти. Моралес во 2008 година го протера од земјата американскиот амбасадор, како и државните агенции на САД кои работеа во Боливија. Во 2019 година тој се кандидираше за трет последователен мандат, наспроти Уставот на земјата, а тоа предизвика масовни протести.

Под притисок на војската, Моралес поднесе оставка и побегна од Боливија. Иако Врховниот суд неодамна пресуди дека Моралес не смее да се кандидира на изборите закажани за август годинава, тој продолжува да инсистира кандидатурата да му биде прифатена.