Младиот поет Исток Ј. Улчар ја промовираше својата четврта поетска книга. Со наслов „Порој од пепел“, збирката беше промовирана на 9 јули пред МКЦ со запазување на препорачаните мерки за заштита.

– Упорно барајќи си ја назад невиноста, полека отстранувајќи ги порталите за влез на болката, конечно и со олеснување, веќе кон крајот на стихозбирката, лирскиот субјект успева да го заспие „остарено[то] бебе / чиј плач ја поти проѕирната плазма на светот“, притоа алудирајќи на сопственото лечење на тивок оган, со потхранување и на вљубеност во внатрешните „ладнокрвни демони“ коишто се заслужни за тоа „што во порите сила му се вселува“ и „што во черепот мудрост му се вгнездува“. Ваквото повратно и зависничко враќање кон изводните канали на реалноста, како кон солидни количини морфиум, го носат лирскиот субјект кон отрпнатост, за тој потоа да објави дека постојаното навраќање кон вистината ја убило неговата емпатија, која тој самиот ја закопал „во подот на неговата заклучена соба“ – напиша рецензентката Мања Величковска.

Исток Ј. Улчар (1996, Скопје) од 2014 година досега објави четири книги поезија. Негови песни и расказ се застапени во избори на дела од млади македонски и ексјугословенски автори. Учествувал на повеќе поетски читања кај нас и на два поетски настани во Белград, Србија. Негови песни се преведени на српски, на унгарски и на англиски јазик.

(Текстот е објавен во „Културен печат“ број 39, во печатеното издание на „Слободен печат“ на 11-12 јули 2020)