Џо Бајден се пошегува дека потенцијалното одобрување на неговата претседателска кандидатура од познатата пејачка Тејлор Свифт е „класифицирано“. Бајден синоќа се појави на ток-шоуто „Доцна навечер со Сет Мејерс“ на Ен-Би-Си.

Кога станува збор за овогодинешните претседателски избори, Бајден бара дополнителни начини како да допре до гласачите, бидејќи досега во голема мера ги избегнуваше прес-конференциите во Белата куќа и интервјуата на телевизиите. Бајден го прескокна и традиционалното претседателско интервју пред Супербоулот.

Бајден се соочи со критики како медиумски најсрамежливиот претседател во модерно време. Откако ја презеде функцијата, тој има направено 86 интервјуа, споредено со 300 на Трамп и 422 на Барак Обама во истиот период од нивното претседателствување.

За време на интервјуто, Мејерс го праша Бајден за теоријата на заговор што се шири меѓу некои конзервативци дека момчето на Тејлор Свифт и актуелен шампионот на НФЛ лигата со тимот на Канзас Сити Чифс, Тревис Келси, се дел од деталниот заговор за да им се помогне на демократите да победат на изборите во ноември.

„Дали можете да потврдите или негирате дека постои активен заговор помеѓу вас и госпоѓицата Свифт?“ праша Мејерс.

„Од каде ги добивате овие информации, тие се доверливи“, одговори Бајден, додавајќи дека Свифт го поддржала за претседател во 2020 година.

Бајден, кој има 81 година и е најстариот американски претседател досега, исто така се осврна на загриженоста за неговата возраст, велејќи: „Морате да го погледнете другиот, тој е стар колку што сум јас, но не може да се сети на името на неговата сопруга.”