Под слоганот „Од сон до реалност, за вечност“ денеска се одбележува Денот на независноста на Република Македонија – 8 Септември. Активностите во организација на Владата започнаа синоќа со почесна артилериска стрелба од 10 плотуни во касарната „Илинден“ во Скопје.

Свечената академија ќе се одржи во Македонската филхармонија, каде што ќе се обрати претседателот на Владата, Христијан Мицкоски. Во рамките на одбележувањето, собраниска делегација предводена од потпретседателот Антонијо Милошоски и составена од пратениците Сергеј Попов и Славјанка Петровска, ќе положи цвеќе на вечното почивалиште на првиот претседател на Републиката, Киро Глигоров, поранешниот претседател Борис Трајковски и првиот премиер Никола Кљусев.

На свеченост во Собранието во петокот, беше доделена годишната награда за животно дело „8 Септември“ на македонскиот одбојкар, тренер и универзитетски професор Јошко Миленковски.

Признанија беа доделени и на Хамид Бакија, Зоран Николовски, Виктор Тевчев и Кирил Манев за нивните достигнувања во спортот.