Како што пренесува британскиот „Атлетик“, два натпревари кои се одиграа летово во квалификациите од Конференциската лига се наводно под истрага на Европската фудбалска унија (УЕФА).

Тие се поразот на Македонија Ѓорче Петров против РФС од Летонија, како и победата на Алашкерт од Ерменија против Арсенал Тиват од Црна Гора, а причина се невообичаено големиот број на обложувања на тие натпревари.

Потсетување дека првиот меч во Скопје заврши со пораз на Македонија ЃП од 0:1 против РФС, а на реваншот во Летонија РФС славеше со 4:1, до 58 минута резултатот беше 1:1.

– Во согласност со својата долгогодишна практика, УЕФА се воздржува од коментирање на истрагите, па дури и од постоење на потенцијални истраги за наводно местење натпревари за да не се компромитираат истражните процеси. Во однос на активностите против местење натпревари на национално ниво, УЕФА обезбедува широк спектар на експертиза на своите национални асоцијации и, особено, на својата мрежа на службеници за интегритет назначени во секоја национална асоцијација – соопштуваат од УЕФА.

Сите споменати четири клубови не успеаја да стигнат до групната фаза и беа елиминирани од натпреварувањето.

– Нашиот клуб секогаш поставува само највисоки стандарди на теренот, но и надвор од теренот. Принципите за интегритет се суштината на фудбалот. Секогаш докажуваме сè на теренот. Исклучок од наша страна не беа ниту двете средби против Македонија ЃП кои ги добивме и отидовме во следната рунда. Ова е сè што можеме да коментираме – рече портпаролот на летонската РФС.

„Атлетик“ воедно информира дека нема коментар од Алашкерт, Арсенал Тиват и Македонија ЃП.