Македонскиот естраден новинар Зоран Василевски, познат како Зоки Фаци, почина утрово по долга битка со ракот на 52 години.

Тажната вест ја објави неговиот пријател и соработник Стефан Лазаров.

„За жал, утрово во 6.40 почина Зоран Василевски. По долга борба со ракот, тој не успеа. Македонија изгуби новинар, другар, човек кој знаеше да помага на сите.

Сочувство до фамилијата и блиските. Погребот ќе биде утре, а каде и кога ќе ве известам.

Те сакам пријателе, секогаш ќе се сеќавам на тебе и на твојата насмевка. Многу ќе ми фалиш“, напиша Лазаров во објава на Инстаграм.

Тој неколку години се бореше со туморот, се оперираше пред речиси две години , но за жал ракот се врати и минатата година повторно беше подложен на операција. Зоки неодамна беше и во Турција, каде што требаше уште еднаш да биде опериран, но лекарите таму му соопштија дека ракот метастазирал на коските.

Зоран Василевски важеше за еден од најпознатите македонски естрадни новинари. Во неговата повеќегодишна кариера тој беше дел од неколку медиуми и проекти. Кариерата ја почна во дневниот весник „Вест“, а потоа работеше како водител на естрадниот магазин „Фаци“ во А1 телевизија, од каде што го доби и прекарот Зоки Фаци.

Од познатата А1 телевизија продолжи да работи на неколку интернет портали, а беше дел и до 1тв. Последниот професионален ангажман го имаше заедно со Стефан Лазаров, во нивниот заеднички поткаст, а се оствари и како директор на националниот избор за Мис Универзум кој се одржа на 8 октомври 2024 година.

И покрај тешката битка со ракот, Зоки беше ведар, не се предаваше и до последен момент јавно зборуваше дека ќе го победи ракот и ќе се врати во новинарските води.