Француската актерка Анук Еме, која беше вистинска икона на француската кинематографија, почина на 92-годишна возраст. Тажната вест ја сподели нејзината ќерка со објава на социјалните мрежи. Таа откри дека мајка ѝ починала во нејзиниот дом во Париз, без да даде дополнителни детали.

Низ годините, Еме глумеше во филмови на Федерико Фелини, Жак Деми, Сидни Лумет, Бернард Бертолучи и Клод Лелуш.

Може да се каже дека нејзината улога во филмот „Маж и жена“ („Un homme et une femme“), кој е во режија на Лелуш, ѝ ја одбележа плодната актерска кариера. За ова филмско остварување, Еме доби номинација за Оскар за најдобра женска улога и ја освои престижната филмска награда Златен глобус.

Таа, исто така, глумеше во легендарните филмови „Сладок живот“ („La Dolce Vita“) (1960), „Осум и половина“ („8½“) (1963), „Лола“ („Lola“) (1961) итн.

На 16-годишна возраст, таа глумеше во „Љубовниците во Верона“ („The Lovers of Verona“) (1949), адаптација на Ромео и Јулија од Андреа Кајет, а во следните две децении се појави во над 40 филмови.