Шведскиот град Малме ќе биде домаќин на Изборот за песна на Евровизија во 2024 година, објави „Асошиетед прес“.

Изборот за песна на Евровизија ќе се одржи во Арената Малме, полуфиналните вечери ќе бидат на 7 и 9 мај, а финалето е закажано за 11 мај.

„Го избравме Малме затоа што ги исполни сите критериуми“, изјави извршниот продуцент Еба Адиелсон за националната шведска телевизија.

Оваа година, победата отиде во рацете на шведската претставничка Лорин, која ги освои симпатиите на жири-комисијата и многубројната публика пред малите екрани со песната „Tattoo“. Ова е нејзина втора победа на ова музичко натпреварување – во 2012 година победи со песната „Euphoria“, која важи за една од најуспешните победнички песни во историјата на Евровизија.

Ова беше седма победа за Шведска на Евровизија и со тоа го достигна рекордот на Ирска, која исто така има седум победи.