Во Ново Лисиче и Реонски центар до крајот на септември треба да биде воведено зонско паркирање. Подготовките траат повеќе од две години, период во кој според Општина Аеродром било спроведено и анкетирање на граѓаните за тоа дали се за зонско паркирање или не, а од неодамна на дел од просторот, којшто ќе биде опфатен со регулирано паркирање, веќе се обележени паркинг места и поставени информативни табли.

Зонското ќе го регулира ЈП „Градски паркинг“ и ќе биде опфатено во Д-зоната каде паркирањето од час ќе чини 25 денари.

Градоначалникот Дејан Митески денеска соопшти дека се чека само одобрување од надлежните и дека зонското истовремено ќе биде воведено во двете населби.

Зонското паркирање во Реонски центар ќе започне паралелно со зонското во Ново Лисиче. Општината изготви проект и чека одобрување на проектот од Град Скопје и Министерството за внатрешни работи. Веќе сме во координација со „Градски паркинг“, подготвени се веднаш да започнат со бележење и поставување информативни табли. Очекуваме до крајот на септеври за започне зонското паркирање во Ново Лисиче и во Реонски центар – вели Митески.

Жителите на Ново Лисиче и Реонски центар се анкетираат дали се за зонско паркирање

Општината проектот го најави уште во 2023 година посочувајќи дека процесот ќе се одвива преку транспарентна постапка и со вклученост на јавноста  и дека „Градски паркинг“ ќе спроведе кампања преку која ќе ги информира жителите за придобивките од зонското паркирање, а дека паралелно ќе се спроведува и теренска анкета преку која граѓаните ќе можат да го кажат својот став за предложената иницијатива за регулирање на паркирањето во овој дел од општината.

На барање на граѓаните од овој дел од Аеродром и преку транспарента постапка и со вклученост на јавноста, по завршување на анкетата очекуваме да почне реализацијата на проектот со кој конечно ќе се регулира паркирањето во овој дел од општината, чекор што ќе овозможи нови паркинг-места, бесплатно и сигурно паркирање за станарите и со тоа ќе се стави крај на проблемите со недостаток на паркинг-места и узурпирање на паркингот од стари и хаварисани возила – соопштија тогаш од Општината.

Зонското ќе се шири во Ново Лисиче и во Реонски Центар: Од Општината тврдат дека 75 отсто од жителите биле – за!

Оттаму по завршувањето на теренската анкета,информираа дека  мнозинството од жителите, односно околу 75 отсто, се изјасниле позитивно на иницијативата на Општина Аеродром за ставање ред во паркирањето, иако некои од граѓаните со кои разговаравме тврдеа дека ниту виделе анкетар, ниту до нив стигнала анкета за да можат да го дадат своето мислење за планираното воведување зонско паркирање.

Како и да е, зонското ќе стартува пред локалните избори и според досегашното искуство на скопјани во чии населби веќе е воведено, нема да го реши, но секако ќе го олесни проблемот со наоѓање слободно паркинг место за жителите во Ново Лисиче и Реонски центар.