Шкендија ја отвори новата сезона во Првата македонска фудбалска лига со убедлив триумф од 5:1 над Шкупи, во пауза меѓу двата дуела со Карабах во квалификациите за Лигата на шампионите.

Тимот од Тетово немаше проблеми против гостите, кои настапија со значително подмладен состав, дури седум младинци во стартниот тим.

Првиот гол во сезоната го постигна Флорент Рамадани во осмата минута со силен удар од 25 метри, но Шкупи брзо израмни преку Малик Хајвали во 14 минута.

Само три минути подоцна, гостите останаа со играч помалку по исклучувањето на Ендрит Рустеми, поради два жолти картони, а Шкендија тоа го искористи, Арбин Зејнулаи погоди во 21 минута за ново водство.

Вториот дел мина во целосна доминација на домаќините. По еден час игра, тренерот Јетон Беќири внесе свежи сили од клупата, меѓу кои и капитенот Бесарт Ибраими, кој за кратко време постигна два гола, во 70 и 76 минута. Крајниот резултат го постави Лиридон Љатифи во 83 минута, за убедлив старт на сезоната за шампионот.