Поемата „Се умира ли од премногу сакање?!“ е новото книжевно-поетско дело на македонскиот писател Зоран Пејковски, која е посветена на безвремениот и бесмртен Петре М. Андреевски (1934 – 2006), а по повод одбележувањето на 90-годишнината од неговото раѓање.

Рецензенти на ова значајно дело се академик Катица Ќулавкова, Јордан Плевнеш и Владимир Илиевски. Инаку, оваа е прва објавена книга во 2024-та година, и шеста поема од вкупно 65 книжевно-драмски, поетски, прозни, научни, публицистички и преведувачки остварувања на Пејковски.

Поемата е составена од 25 пеења и низ длабоко рефлексивна јазичка сонда ги поврзува вековите во духот на поетиката и јазикот на Петре М. Андреевски и ја става неговата поема „Дениција“ како основен столб врз кој се гради поетскиот наратив.

Рецензентот Владимир Илиевски за поемата, меѓу другото, напиша дека авторот со својот инспиративен творечки континуитет го надополнува корпусот на македонската книжевност со дела кои длабоко продираат во македонската историја и во македонската културна историја.

– Зоран Пејковски со своите стихови само го допозлатува ореолот околу „Дениција“. Тој возвишено пее поместувајќи ги реските меѓи помеѓу поимите/ феномените жена, љубов, страст, слобода, татковина, Македонија, историја, радост, тага – посочува Илиевски.

Зоран Пејковски е македонски драмски писател, драматург, поет, сценарист, прозаист, публицист, театролог и единствен натуралист во македонската литература. Тој е и доцент од областа Драматургија на Факултетот за театарски уметности при Интернационалниот универзитет „Европа Прима“ од Скопје.

(Текстот е објавен во „Културен печат“ број 229, во печатеното издание на весникот „Слободен печат“ на 3-6.5.2024)