Романскиот писател Козмин Перца пред македонската културна јавност ќе се претстави со поетскиот перформанс „Војна“, што ќе се одржи на 24 септември (среда), во 20:30 часот, во кафе-книжарницата „Буква“, известија од Македонскиот ПЕН-Центар.

На перформансот ќе му претходи кратко претставување на поетскиот опус на Перца од страна на Никола Маџиров и Владимир Мартиновски. По перформансот предвиден е и разговор со публиката, кој ќе го води Роберт Алаѓозовски. Поетскиот перформанс ќе биде изведен на англиски и на романски јазик со употреба на мултимедијални средства: музика, говор на телото и видео фрагменти од претходни изведби на Козмин Перца.

Козмин Перца овој месец престојува на резиденција во Скопје, во организација на издавачката куќа „Готен“, поддржана од европската мрежа за превод и книги „Традуки“. Тој е претставник на Романскиот ПЕН-центар во Балканскиот ПЕН книжевен круг, во чии рамки е активен и Македонскиот ПЕН-центар.

Козмин Перца е роден во Марамуреш, Романија, во 1982 година. Тој е поет, романописец, драматург и есеист. Дипломирал на Факултетот за книжевност на Универзитетот Бабеш-Бољаи во Клуж. Перца магистрирал по современа литература на Универзитетот во Букурешт, а потоа докторирал со теза за фантастичната литература. Неговите дела се преведени на осумнаесет јазици, а во 2012 година е избран за најдобар млад романски прозаист. Во романскиот и странскиот печат има повеќе од петстотини рецензии и референци за делото на Перца.

Во последните десет години, тој е награден со некои од најпрестижните романски книжевни награди. Неговите романи се преведени на српски, хрватски и арапски јазик, а има и антологии на поезија преведени на француски и шпански јазик.

Перца моментално работи како хонорарен уредник и професор по компаративна книжевност на Универзитетот „Хиперион“ во Букурешт. Учествувал на голем број книжевни фестивали во светот, меѓу кои и на СВП, известија од Македонскиот ПЕН-Центар.