Откако вчера Собранието ја отфрли иницијативата на родителите за референдум за дигиталните учебници, со образложение дека неопходните потписи биле собрани спротивно на Законот за референдум, воспитувачката Драгана Спасевска која стои зад иницијативата „Учебници и настава мора да има“ соопшти дека тие нема да застанат и ќе продолжат во борбата за укинување на дигитализацијата. 

Таа најави дека гласот на родителите нема да запре и ќе бараат нови начини да го спроведат она што го ветиле.

Родителите, покрај предлогот за референдум до Собрание, доставија и барање за работни средби со премиерот Зоран Заев и претседателот Стево Пендаровски, но од нивна страна одговор и натаму нема.

– Премиерот и Претседателот се уште не се изјасниле и не изразиле желба да се сретнат со нас, нагласи Спасевска.

Покрај ова, родителите кои стојат зад оваа иницијатива најавија и дека ќе продолжат со мирните протести, а во наредните денови ќе биде објавено и кога ќе се одржи следниот протестен марш.