Македонскиот кошаркарски стратег Борче Даскаловски е изборот на управата на битолскиот клуб за нов шеф на стручниот штаб на „зелено-белите“, откако беше потпишан договор за соработката за новата натпреварувачка сезона.

Даскаловски на клупата на Пелистер пристигнува и како актуелен помошник на селекторот Марјан Илиевски во репрезентацијата. Оваа улога ја извршуваше и во времето кога репрезентацијата беше предводена од Јорданчо Давитков.

Своевремено имаше и успешна играчка кариера, во која една година мина токму во дресот на Пелистер (2006//07). Потоа ги направи првите чекори и како тренер, најпрвин во Вардар, а потоа и во Карпош Соколи, тим што го предводеше во европските купови. Извесен период беше и дел од стручниот штаб во Астана, додека прв тренер на овој клуб во ВТБ-лигата беше Емил Рајковиќ. Негов последен тренерски ангажман беше како предводник на Кожув каде се задржа неколку месеци.