Патниците кои платиле за тригодишно крстарење околу светот се „заглавени“ во Белфаст, Ирска веќе три месеци, а овој град практично станал нивен дом, пишува „Њујорк пост“.

Крузерот Одисеја, со кој управува компанијата „Вила ви резиденс“, пристигнал на островот Квинс во Белфаст, Северна Ирска за да биде опремен пред да тргне на првиот дел од тригодишното крстарење. Иако требало да исплови на 30 мај, бродот сѐ уште е на истото место поради проблеми со кормилото и менувачот.

Меѓу патниците е и Холи Хенеси од Флорида, на која Белфаст практично ѝ станал дом. Друштво во кабината ѝ прави мачорот Капетан. Како и другите патници, таа може да го помине денот на бродот за крстарење, но мора да го напушти навечер.

„Во текот на денот можеме да останеме на бродот. Можеме да јадеме, да гледаме филмови и да се забавуваме, да правиме сѐ што е планирано за време на крстарењето“, рече таа.

На патниците им била дадена опција да купат кабина наместо да плаќаат дневна цена за нивната соба како во традиционалниот хотел. Ова им овозможува да останат на бродот за крстарење дури и по првата тура.

„Сакам да останам што е можно подолго. Отсекогаш сум сакала да живеам на брод, тоа ми е остварување на сонот“, рекла Американката.

Цената на кабината се движи од 99.999 до 899.000 долари. Нејзината кабина има голем кревет, мала дневна област и балкон.

Организаторите на крстарењата тврдат дека прават сѐ за да ја „намалат тензијата“ на патниците и планираат различни патувања, други крстарења или ги сместуваат во хотели. Анџела и Стивен Териак го искористиле тоа и веќе отпатуваа во Шпанија, Англија и Гренланд.

Сепак, бродот за крстарење треба да исплови до крајот на следната недела.