Актерката Памела Андерсон (57) присуствуваше на Филмскиот фестивал во Цирих, каде нејзиниот филм „Последната шоу-девојка“ („The Last Showgirl“) ја доби наградата „Златно око“. Во оваа прилика, филмската ѕвезда откри дека долги години се соочувала со депресија, пишува „Дејли мејл“.

„Имам чувство како да сум стигнала од ‘Чувари на плажата’ до Бродвеј. Не знам што се случи измеѓу, ми делува како да сум била во магла. Среќна сум што сум тука, во овој момент, бидејќи мислам дека бев депресивна во последните неколку децении“, рече таа.

„Никогаш не мислев дека ќе бидам на сцена и дека ќе добијам ваква награда. Само сакам да продолжам да работам. Возбудена сум што ќе правам повеќе. Одлично е да се биде дел од поп-културата, но тоа истовремено е благослов и проклетство. Луѓето се заљубуваат во тебе поради твојот костим за капење. Ми требаше долго време, но тука сум“, додаде Андерсон.

Исто така, таа проговори и за своето скромно растење во Канада.

„Кога ќе растеш на остров, луѓето не заминуваат. А кога ќе заминеш, луѓето зборуваат. Им дадов доволно материјал за да ме исмеваат. Без надомест… Мислам дека немаше да можам да го изиграм овој лик во ‘Последната шоу-девојка’ ако немав живот каков што имав, па вредеше. Ако можам да продолжам да работам и да ги користам овие борби и предизвици – ќе се чувствувам благословена“, рече актерката.

„Се обидов да се вратам на работите што се случија во моето детство. Можев да ги ‘намирисам’ куќата, цигарите и алкохолот и беше важно да го погледнам сето тоа. Се обидував да си ја вратам моќта“, додаде таа.

„Последната шоу-девојка“ беше проект „живот или смрт“ за Андерсон. Таа едвај чекаше да го сними овој филм, а од сите нејзини колеги најмногу се плашела од актерката Џејми Ли Кертис.

„Сега се чувствувам како да ја познавам цел живот. Таа те фати за раменици, те погледна во очи и ми рече: ‘Можеме да го направиме ова’“, Андерсон сподели неколку убави зборови за нејзината колешка.

Да потсетиме, „Последната шоу-девојка“ е драма во режија на Џиа Копола, а главните ликови ги играат Памела Андерсон, Џејми Ли Кертис, Дејв Батиста, Бренда Сонг и Кирнан Шипка.

Филмот ја доживеа светската премиера во рамки на Филмскиот фестивал во Торонто, на 6 септември.