Деновиве сме сведоци на нагло зголемување на надворешната температура, па затоа не е изненадувачки што приоритет е потрагата по начините за што е можно повеќе разладување.

Покрај климатизацијата, ладните пијалаци и сладоледот, постои и друг начин, а тоа се намирниците и јадењата што го освежуваат, хидрираат и ладат телото на одличен начин, пишува „Митрополит Си“.

Искусниот словенечки патник Вид Леградиќ го сподели своето богато искуство од разни дестинации во светот, а која е најдобрата храна за разладување, дознајте во продолжение.

Ѕаѕики

„Тешко можеме да замислиме жешки лета и прекрасни плажи без традиционалната грчка салата од краставици. Ѕаѕикито не само што го хидрира телото, туку и го лади. Комбинацијата од јогурт, краставица и лимон едноставно ве разладува“, порачува Вид.

Тој објаснува дека причината за ова е метаболизмот на човечкото тело. Како што наведува, разладувањето на храната помага да се отстрани топлината од телото со помош на хидратација, а исто така го ослободува телото од токсини и го забрзува метаболизмот. Од друга страна, загревањето на храната му дава на телото повеќе енергија.

Зачинета храна

„Како патник, првпат во Индија ја искусив моќта на разладувачката моќ на храната. Влажната тропска клима таму бара повеќе од само пиење вода. Индијците го пронајдоа решението во зачините и лутите нијанси на чили пиперките.“

На југот, најжешкиот дел од оваа разновидна земја, консумирањето речиси секое јадење беше вистинска авантура. Масала доса (индиска палачинка со фил од компири), ориз бријани (ориз со кромид и зачини), кари, сè беше толку луто што се потев обилно.

Па сепак, секогаш кога ги замолував готвачите да го направат јадењето помалку зачинето, тие само се смееја и одмавнуваа со главите, велејќи: „Господине, врелата храна ќе ве разлади однатре.“

На почетокот ми се чинеа чудни овие тврдења. Но, на крајот сфатив дека се во право, бидејќи науката вели дека јадењето зачинета храна ја зголемува внатрешната температура на телото на начин што одговара на температурата надвор од телото. Многу едноставно. А тука и потењето, кое го лади телото додека вишокот топлина испарува од организмот.“

Хумус

Вид понатаму открива дека на Блискиот Исток храната што лади е хумусот.

„Ги искусив неговите интересни својства среде пустината, кога авантуристите, исцрпени од одење по жежок песок и ветер, јадеа чинија хумус до последниот залак.“

Хумусот лади затоа што е извор на манган кој се бори против слободните радикали и молибден кој помага во детоксикација на кожата со отстранување на сулфити. Исто така, тука се и фолатите и витаминот Б, кои ги негуваат клетките на кожата и го намалуваат оштетувањето од сонцето. Резултатот: растоварената кожа подобро ја спроведува топлината.

Гаспачо

Но, постојат и јадења кои се измислени токму заради ладење, како на пример, сладолед и малку поздраво гаспачо од Шпанија. Вид вели дека оваа вкусна зеленчукова супа базирана на домати, лук и маслиново масло секогаш се служи ладна.

„Тоа е одраз на жешкиот пејзаж на Андалузија, од каде што потекнува. Оваа супа е намерно осмислена да биде ладна за да ве разлади во текоте на жешкиот шпански ден. Истото важи и за мексиканската супа од лимон, дури и ако се јаде врела, бидејќи нејзината киселина има ефект на ладење и детоксикација.“

Цитруси и други овошја

Исто е и со другите цитрусни овошја и секако со оние овошја и зеленчуци што хидрираат. Ладна праска и ладна лубеница одлично се вклопуваат во жешкиот летен ден. Овој процес е толку ефикасен што внатрешноста на лубеницата може дури и да се замрзне. Вид ве советува да го пробате овој експеримент и сами да се уверите.