Американскиот актер Џорџ Клуни, кој е поддржувач на Демократската партија, денеска го повика американскиот претседател Џозеф Бајден да се откаже од својата претседателска кандидатура.

Клуни во написот на „Њујорк тајмс“ изјави дека му се допаѓа Бајден, но оцени дека Демократската партија ќе ја загуби претседателската трка, како и сета контрола во Конгресот со Бајден како кандидат.

„Ова не е само мое мислење. Ова е мислењето на секој сенатор и член на Конгресот и гувернер со кои сум разговарал приватно“, рече Клуни, пренесе „Асошиејтед прес“.

Клуни беше домаќин на неколку собири за собирање средства во Холивуд, вклучувајќи го и оној за Бајден минатиот месец.

Актерот рече дека Демократската партија треба да избере нов претседателски кандидат на својата конвенција следниот месец, велејќи дека партијата на тој начин ќе ги придобие гласачите.

Бајден веќе се соочува со зголемен притисок во сопствената партија да се повлече од трката за реизбор откако доживеа дебакл за време на телевизиската дебата со републиканскиот претседателски кандидат Доналд Трамп минатиот месец.

Бајден рече дека има намера да остане во трката и повторно ги отфрли повиците да се откаже во писмо до демократите во Конгресот, повикувајќи ги да се обединат зад неговата кандидатура.