Отстранети пречките за изградба на третата делница од пругата кон Бугарија, вели Мицкоски
Почнуваат активностите за проектот за изградба на третата делница од пругата кон Бугарија од Коридорот 8, најави премиерот Христијан Мицкски.
Препорачано
Тој појасни дека ова следи откако биле отстранети пречките од минататото и дека Владата донела одука да активира грант од Европската инвестициска банка како техничка поддршка за ревизија на основниот проект, по што ќе биде објавен тендер за градежните работи.
– Третата фаза ќе биде од големо значење за нас како држава. На тој начин ќе ја потврдиме нашата цел да бидеме крстосница на многу значајни паневропски коридори 8 и 10. Третата фаза е во процес на развивање, битно е дека сите пречки од минатото што се случуваа се надминати, постигната е согласност со нашиот источен сосед. Нашиот дел, би рекол со одлуката на Владата да се активира грантот што значи техничка поддршка од страна на Европската инвестициска банка (ЕИБ) значи дека и ние почнуваме со овој проект. Техничката поддршка значи ревизија на основниот проект, ревизија на целосната документација и потоа објавување јавен повик за изградба на третата фаза, изјави Мицкоски, по увид во градежни активности на државниот пат А2, обиколница „Крива Паланка“.
Со тоа, дополни премиерот, практично ние ќе ја заокружиме целата делница која што е дел од Коридор 8, од Куманово до граница со Бугарија. Тој рече дека во напредна фаза се и работите на Кородорот 10, кој е дел од договорот со Обединетото Кралство и најави убави вести во периодот што следи.
Оваа недела на владина седница беше донесе одлука да се ефектуира Договорот за грант за техничка поддршка во висина од 3,7 милиони евра добиен од ЕИБ. Со ова, како што информираа од Владата, избраниот консултант во следниот период ќе изработи нова проектна документација, како и подготовка на тендерската постапка за избор на изведувач. Дополнително, за да се забрзаат активностите, ЈП Железничка Инфраструктура ќе започне постапка за избор на надзор на изградбата.
Третата делница од пругата кон Бугарија, од Крива Паланка до бугарската граница, е во должина од 23,4 километри со планирани 22 тунели, од кои и меѓуграничен, како и 52 моста. Со тендерот што пропадна, како што објави Владата, вредноста од првично планираните 340 милиони евра била зголемена на 560 милиони евра.
По повеќемесечен застој Македонија и Бугарија на крајот на јуни на министерско ниво постигнаа договор за придвижување на работите за железничкото поврзување.
