Еден од највлијателните портали за бизнис вести во Грција, објави дека Јунајтед Груп се обидува да ги скрие своите огромни финансиски проблеми, како намаленото количество расположливи пари како и преоптовареноста со долгови, околу 7 милијарди евра.

,,Митовите и вистината за Јунајтед Груп” е насловот на деталната анализа за работењето на групацијата на Драган Шолак на грчкиот портал Капитал.гр.

Јунајтед Груп во Грција има сопствеништво врз еден од најголемите оператори Нова, кој беше создаден со спојувањето со големиот провајдер Винд Хелас. За да добијат дозвола за ова, Шолак и компанијата на грчката влада и ветиле инвестиција од дури 2 милијарди евра во проекти за дигитализација.

Сето ова привлече големо внимание кај грчката јавност и тамошните медиуми, особено зашто Шолак уште не го има исполнето ветувањето за мегаломанската инвестиција.

Во Атина не запира медиумската бура за финансискиот бунар во кој е Драган Шолак заедно со своите партнери, нешто што тие се обидуваат да го демантираат.

Со оглед на тоа што од Нова и од Јунајтед Груп констатно одбиваат јавно да ги објават извештаите за работењето, тврдејќи дека тоа не им е деловна пракса, Капитал.гр сам дојде до овие доверливи финансиски извештаи од 2022 година кои им се доставени само на одбрани инвеститори и кредитни агенции, објави порталот.

Како што додаваат оттаму, овој извештај индиректно но многу јасно укажува на проблематична финансиска ситуација а тврдењето на групацијата на Шолак дека бележат големи успеси не се вистина туку мит.

Во анализата се оспорува верзијата дека групата заработила големи приходи и оперативна добивка, бидејќи тоа според анализата не се заснова на реално работење, туку до таквата ситуација дошло со аквизиција на други фирми како што се Винд Хелас во Грција и Оптима Телеком во Хрватска. Притоа, за да ги купи тие компании, групацијата на Шолак морала да се задолжи.

Едноставно речено, Јунајтед Груп практично купила значаен дел од своите приходи и оперативната добивка, на начин што позајмувале пари. За купувањето на Винд Хелас на пример, издале две серии обврзници со вкупна вредност од 980 милиони евра. Првата серија од 400 милиони евра и со променлива каматна стапка, им доспева за наплата во 2029 година, а другата од 580 милиони евра и со фиксна каматна стапка им доспева за наплата една година подоцна, пишува Капитал.гр.

Во анализите се истакнуваат и проблемите на Шолак со готовината која ја има на располагање. Имено, Јунајтед Груп бележи негативен прилив на готовина, конкретно расположливата готовина сега им е во износ помал за 54 милиони евра, а ликвидноста на готовината во 2022 година им опаднала на од 155 на 100 милиони споредено со 2021 година.
Коментирајќи го извештајот на Капитал.гр, претставник на Јунајтед груп изјавил дека компанијата има силен раст на приходите и профитабилноста.

– Во првата половина на 2023 година, нашите оперативни профити се зголемија за 10%. Виваком Бугарија ја зголеми својата оперативна добивка за 18%, Нова Грција за 13% и Телемах Хрватска за 12%. Нашата групација порасна за 60% во споредба со истиот период во 2022 година. Покрај тоа, по затворањето на продажбата на мобилните базни станици, на 25 август целосно ги отплативме белешките од 2024 и 2025 година и делумно нашите револвинг кредитни капацитети, вели претставникот на групацијата.

Српскиот милијардер Драган Шолак е сопственик на телекомуникациската компанија Јунајтед груп, на чело на инвестициската групација Спорт Република.

Извор: Капитал.гр