Француски научници идентификуваа нова крвна група, наречена „Гвада негатив“, што ја има Французинка од карипскиот остров Гвадалупе. Таа е единствената позната личност во светот со оваа, сега 48-ма по ред, призната крвна група.

Веста ја објави Француската агенција за крв ЕФС (EFS), истакнувајќи дека откритието е направено дури 15 години откако истражувачите првпат добиле примерок од крв од пациент кој бил на рутинско тестирање пред операцијата, пренесува „Франс 24“.

– ЕФС штотуку ја откри 48-мата крвна група во светот! – се наведува во официјалното соопштение објавено на мрежата LinkedIn.

Откритието беше официјално признато на почетокот на јуни во Милано од страна на Меѓународното здружение за трансфузија на крв (ISBT), кое дотогаш го признаваше постоењето на 47 крвни групи. Точната крвна група е клучна за примање безбедна трансфузија и може да спаси живот.

Тиери Пејрар, медицински биолог од EFS кој учествуваше во истражувањето, за АФП изјави дека во 2011 година кај пациентка било откриено „многу необично“ антитело, но дека во тоа време немало доволно ресурси за подетално истражување.

Мистеријата конечно беше решена во 2019 година со помош на напредно секвенционирање на ДНК, кое укажа на присуство на генетска мутација. Жената, која тогаш имала 54 години и живеела во Париз, била на рутински тестови кога во нејзината крв било откриено непознато антитело.

– Таа е без сомнение единствениот познат случај во светот – рече Пејрар.

– Таа е единствената личност на светот која е компатибилна со себе – додаде тој, посочувајќи дека жената ја наследила оваа крвна група и од таткото и од мајката, бидејќи и двајцата го имале мутираниот ген.

Името „Гвада негатив“ се однесува на потеклото на пациентот, а Пеџар наведува дека името е добро прифатено меѓу експертите бидејќи „звучи добро на сите јазици“.

Крвниот систем АБО, најпознатиот, е откриен на почетокот на 20 век и е определен од присуството или отсуството на специфични антигени во крвта. Благодарение на секвенционирањето на ДНК, откривањето на нови крвни групи е забрзано во последниве години.

Пејрард и неговиот тим сега се надеваат дека ќе пронајдат други луѓе со оваа ретка крвна група.

– Откривањето на нови крвни групи значи дека можеме да им обезбедиме подобра грижа на пациентите со ретки крвни групи – рекоа од EFS.