Со мноштвото различни здравствени совети, лесно е да се усвојат навики кои изгледаат здрави, но до одреден степен можат да бидат и штетни за вашето здравје. Еве неколку такви навики на кои треба да внимавате, според советот на диететичар.

Исфрлување на јаглехидрати

Иако популарни, диетите со низок внес на јаглехидрати, како што е кето диетата, може да доведат до нутритивни недостатоци. Наместо целосно да ги елиминирате јаглехидратите, подобро е да изберете цели зрна, мешунки и зеленчук.

„Исфрлувањето на сите јаглехидрати не е решение. Тие се главен извор на енергија за мозокот и мускулите, а нивниот недостиг може да предизвика замор и ментална магла“, објаснува диететичарката Мелиса Митри.

Прекумерно вежбање

Претерувањето со вежбање може да доведе до повреди и чувство на преоптоварување. Центрите за контрола и превенција на болести (ЦДЦ) препорачуваат возрасните да имаат 150 до 300 минути физичка активност со умерен интензитет или 75 до 150 минути активност со силен интензитет неделно.

Избегнување на глутен

Глутенот треба да го избегнуваат луѓето со целијакија или нетолеранција, но без медицинска причина таквата практика може непотребно да ја ограничи исхраната.

„Житарките како пченица, јачмен и ‘рж се богати со влакна, витамини од групата Б и минерали кои го поддржуваат здравјето. Две до три порции дневно може да го намалат ризикот од дијабетес, дебелина и срцеви болести“, објаснува Митри.

Пост

Повремениот пост е популарен на социјалните мрежи, но прескокнувањето на појадокот може да ја намали енергијата и да ја зголеми желбата за храна.

„Ова го отежнува придржувањето кон урамнотежена исхрана долгорочно“, објаснува Митри.

Пред да се воведе постот, се препорачува да се консултирате со стручно лице, пишува „Итинг вел“ (EatingWell).

Веганство

Растителната исхрана може да биде корисна за здравјето, но без внимателно планирање може да доведе до нутритивни недостатоци, односно до недостиг на витамин Б12, цинк и калциум.

„Флексибилен пристап, со акцент на растителни намирници, овозможува разновидна исхрана и доволна количина на хранливи материи“, советува Митри.

Прекумерно пиење вода

Хидратацијата е важна за здравјето, но прекумерното внесување вода може да доведе до хипонатремија – состојба на намалени нивоа на натриум во крвта.

„Пијте вода според чувството на жед и следете ја бојата на урината: светложолтата значи дека сте хидрирани, проѕирната значи дека пиете премногу, а потемната значи дека пиете премалку“, советува Митри.

Избегнување на сонцето

Заштитата на кожата од сонце е важна, но целосното избегнување на сончевата светлина може да го намали производството на витамин Д, кој е клучен за здравјето на коските и имунитетот.

„Краткото изложување од 10 до 30 минути неколкупати неделно ја стимулира синтезата на витаминот Д, со задолжителна употреба на заштита при продолжено изложување на сонце“, посочува Митри.

Премногу сон

Доволно сон е неопходно за здравјето, но ако редовно спиете повеќе од девет часа и се чувствувате изморени, тоа може да укажува на здравствен проблем.

„Ако и по долг сон се чувствувате исцрпено, проверете дали има можни причини како што се апнеја, депресија или проблеми со тироидната жлезда“, советува Митри.