Шокиран сум од реакциите во јавноста околу прашањето дали треба да се осуди геноцидот во Сребреница, порача претседателскиот кандидат на ДУИ и на „Европскиот фронт“, Бујар Османи, поентирајќи дека „тоа било исто како Германија да го негира Холокаустот“.

Прашан дали оваа негова изјава ни е потребна токму сега, со оглед на реакциите од Србија, Османи посочи дека тој очекувал „Србија прва да гласа за да го тргне товарот од нејзините плеќи“, бидејќи се работи за осуда на убиство на 8.000 цивили во Сребреница.

– Не сакам воопшто и да помислам дека некој реагира за вакви настани, особено што Македонија е лидер во регионот која промовира меѓусебни хармонизирани меѓуетнички односи. Ние не сме сами во оваа иницијатива – порача Османи.

Тој беше дециден дека неговата реакција не е насочена кон српскиот народ, ниту кон Србија, ами соодветствува со пресудата на Хашкиот трибунал и ние не смееме да го негираме тоа.

Османи како претседателски кандидат денеска имаше средба со раководството на Стопанската комора на Северна Македонија.