Неконтролираното ископување минерални суровини за брзо ќе ги исцрпи наоѓалиштата што не се на домашната мапа, туку се на светските берзи. Освен тоа, нема контрола колку и дали се прават штети за населението и за околината. Потребни се контрола на ископот, но и повеќе бенефит за општината на која тоа треба да ѝ биде главен извор во буџетот.

Прилеп е со најголем број концесии во државава, објави МРТ. Во 2007 и 2010 година се исправи неправдата од концесиите средства да добиваат и општините. Стигнаа до 78 проценти, но и тоа е малку. Општините немаат контрола кој и како експлоатира, затоа е потребен нов закон што ќе го регулира концесионерството.

Пред две години Владата усвои Информација за изработката на Стратегијата за геолошки истражувања, одржливо искористување и експлоатација на минералните суровини за период од 20 години. За таа намена, тогашниот министер за економија Крешник Бектеши беше овластен да го потпише нацрт-договорот за изготвување на Стратегијата со Македонската академија на науките и уметностите (МАНУ).

– Оваа стратегија, предвидена со Меморандумот за соработка меѓу Министерството за економија и МАНУ има за цел да го определи обемот и начинот на реализација на основните геолошки истражувања, одржливото искористување и потребите за експлоатацијата на минералните суровини што се од битно значење за развојот на стопанството на Република – наведоа од Владата.

Во една претходна анализа на Центарот за граѓански комуникации во земјава вкупно се експлоатирале 50-ина видови минерални суровини, а најмногу концесии се издаваат за експлоатирање варовник, за вода и за песок и чакал. Најмногу од концесиите се издадени на територијата на Општина Прилеп, по што следуваат Гостивар, Струга и Сопиште.

– За добиените концесии се плаќа надоместок по две основи: за користење на површината и за експлоатираните количини – наведоа од ЦГК.