Солистички концерт на Билјана Камчева Божиновска (сопран) ќе се одржи на 13 мај, со почеток во 20 часот, во Фоајето на Националната опера и балет. На пијано ќе настапи Андреја Наунов. Како гостин на концертот ќе настапи баритонот Васко Здравков. На програмата се арии и дуети од оперите „Боеми“, „Травијата“, „Паљачи“ и „Трубадур“.

Билјана Камчева Божиновска е една од најистакнатите и најафирмирани македонски музичари од помладата генерација. Таа е редок пример на музичар активен со два профила на изведба, како флејтистка и како оперска пејачка, и со тоа претставува уникатна музичка појава.

Камчева е добитник на Високото признание „Најдобар млад уметник за 2020 година“ од страна на Претседателот Стево Пендаровски, заради постигнатите високи уметнички и општествени достигнувања.

Дипломира како студент на својата генерација (2015) и магистрира (2017) на ФМУ-Скопје, во класата на проф. С. Темков со кого постигнува значајни резултати на државните и меѓународни натпревари, осум меѓународни и две државни награди.

Ректорот на Универзитетот „Св. Кирил и Методиј“ во 2015 година ѝ доделува пофалница за постигнат најдобар успех во студирањето. Паралелно со студиите на одделот флејта, студира и на студиската програма за соло пеење во класата на проф. М. Наумовска и дипломира во 2016 година.

Во 2015 година ја добива стипендијата „Петар Стаматов“, која ја доделува Универзитетот „Св. Кирил и Методиј“ во Скопје на своите најуспешни студенти.

На сцената на македонската Национална опера и балет дебатира во 2016 година со улогата на Јенте во мјузиклот „Свирач на покрив“ под диригентската палка на Маестро Саша Николовски – Ѓумар. Како концертен солист со оркестарот на Националната опера и балет настапувала во 2014 и во 2016 година. На истата сцена, како оперски солист Камчева Божиновска настапи во детската претстава „Операта на шумските животни“ во 2023 и 2024 година. Bo 2019 година дебитираше во барокната опера „Дидо и Енеј“ од Х. Персел.

Билјана Камчева Божиновска како флејтист бележи солистички настапи и со Македонската филхармонија во 2008 година под диригентската палка на Маестро Ле Фи Фи и во 2022 година под диригентската палка на Маестро Борјан Цанев.

Од 2019 година Билјана Камчева е почесен член на Фондацијата „Томислав Зографски“.

Во 2020 г. ја добива и првата награда на меѓународниот натпревар организиран од Уметничкиот центар „Владимир Кудрја“ од Москва, Русија, во категорија соло пеење.

Била дел од семинари и мастер часови со: Љ. Јовановиќ, М. Симоновиќ, Л. Леваи Аскин, Д. Гавриќ, Ева М. Тонеман, Б. Превишиќ, И. Дурловски, К. Шантл Зупан, Е. Пауд, Н. Конти, П. Данаилов, Г. Гучев, И. Томашев, Ана Дурловски, Ермонела Јахо…

Активно настапува на концерти на фестивалите „Денови на македонска музика“ (ДМM), „Охридско лето“, „Скопско лето“, „Есенски музички свечености“, како солист со Македонска филхармонија, Македонската опера и балет, со камерниот оркестар „Солисти на ФМУ“, со Симфонискиот оркестар на ФМУ – Скопје, била дел од оркестарот „F.A.M.E.’s – Film and music recording company“, како и од Ревискиот оркестар при Македонската телевизија. Настапила на сцените во Москва, Рим, Фиренца, Софија, Бургас, Белград, Ниш, Приштина…

М-р Билјана Камчева Божиновска е вработена на позицијата хорист во Националната опера и балет, член е на Дувачкиот оркестар на Град Скопје како прва флејта и член е на Хорот „Св. Климент Охридски“.

Нејзиниот концертот на 13 мај е дел од годишната програма на Министерството за култура, како проект од национален интерес. Влезот е слободен.