Македонскиот кошаркарски интернационалец Андреј Јакимовски буди голем интерес во Италија каде неколку клубови покажале интерес да го донесат во своите редови, ако се суди според медиумите од „чизмата“.

Крилниот играч ја заврши сезоната во НЦАА лигата во тимот на Колорадо бафалос, па ако не се појави на претстојниот драфт на 26 јуни и не најде ангажман во НБА лигата, ќе се врати во Европа, најверојатно во Италија.

За Андреј (24, 202) досега покажале интерес Олимпија Милано, Тренто, Трст и Тревизо. Првите три од овие клубови настапија во плејофот на италијанската лига, а четвртиот не стигна до таа фаза.

Лесно е веројатно Андреј да се најде во некој од овие клубови идната сзона. Подобро би било за македонската репрезентација Андреј да игра во Европа, затоа што така ќе биде подостапен за македонската репрезентација.

Милано го следи, Тренто му нуди стартно место

Својот интерес кон Јакимовски прв го истакна Олимпија Милано, клуб во кој се уште под договор е македонскиот репрезентативец Ненад Димтриејвиќ, но кој најверојатно во овој преоден рок ќе си замине.

Официјални извори потврдија дека тимот од Милано внимателно го следи Јакимовски, со намера да го вклучи во својот состав за да ја зајакне крилната линија. Олимпија Милано е евролигаш и смета дека тој би можел добро да се интегрира во нивниот играчки систем.

Во Италија има силен интерес уште од три тима. Тренто би му го понудил на Јакимовски стартното место испразнето од Салиу Нијанг, кој неодамна се пресели во шампионот Виртус Болоња. Трст исто така ја проверува достапноста на Андреј, но во овој тим Јакимовски би морал да се бори за стартно место со Дензел Валентајн.

Тревизо и Трст се вклучија

Тревизо ја проценува ситуацијата со својот играч Освалдас Олисевичиус, кој има понуда од Канту. Во случај на заминување на Литванецот, Тревизо би бил подготвен да му даде на Јакимовски со конкретна понуда и важни минути на теренот.

Јакимовски тестираше со неколку НБА тимови, но, според НБА инсајдер ниеден не е подготвен да му даде гаранции за договор, вели „Ла трибуна ди Тревизо“.

Интересот за Македонецот во Италија е нормален затоа што тој настапуваше во младинските категории на Торино пред да замине во НЦАА. Затоа во Италија тој нема да заземе место во тимот како странец.

Минатата сезона со Колорадо, Јакимовски имаше солидна статистика, 10,2 поени, 5,1 скока и 1,3 асистенции по меч, докажувајќи дека може да биде комплетен играч. Неговата способност да шутира од далечина, со процент од 38,8 отсто за три поени, го привлекува вниманието на многу европски и американски клубови.