Јапонските власти, во договор со Меѓународниот олимписки комитет (ИОК), одлучија целосно да го забранат присуството на навивачи на претстојните Олимписки игри во Токио, пренесуваат светските медиуми. Причината за целосната забрана е стравот од ширење на коронавирусот, поради што е прогласена вонредна состојба во Токио.

Олимписките игри кои претходно беа одложени за една година поради пандемијата на ковид-19, ќе се одржат, но без присуство на публика.

Првичната одлука беше да не присуствуваат навивачи и публика од странски земји, а сега забраната важи и за домашните, јапонските љубители на спортот.

Одлуката доаѓа пред сè од јапонската влада, поточно од премиерот Јошихиде Суга.

– Земајќи го предвид влијанието на делта сојот, и со цел да се спречи нејзиното заразување низ целата земја, ние мора да ги преземеме вистинските мерки. Веќе реков дека доколку условите бараат, нема да се двоумам да донесам одлука за целосна забрана за навивачи – рече Суга.

ИОК официјално ја потврди одлуката за забрана на навивачите на сите настани за време на Олимписките игри.

The IOC and the International Paralympic Committee today were informed by the Japanese parties about the impact of the announcement of a state of emergency in Tokyo on the Olympic and Paralympic Games. They supported the policies that were presented.https://t.co/kqAu3YMije

— IOC MEDIA (@iocmedia) July 8, 2021

Вонредна состојба е во сила во Токио со цел да се потисне зголемувањето на случаите на инфекции со коронавирус, и таа ќе трае од 8 јули до 22 август.

Олимписките игри започнуваат на 23 јули и завршуваат на 8 август, додека Параолимписките игри ќе започнат на 24 август. Околу 11 000 олимпијци и околу 4500 параолимпијци се очекува да пристигнат во Јапонија.

Покрај нив, во главниот град на Јапонија доаѓаат околу десетици илјади судии, службени лица, администратори, спонзори и медиумски личности. Јапонија имаше околу 810 000 случаи накоронавирус и околу 15 000 смртни случаи. Само 15 проценти од Јапонците се целосно вакцинирани.