Како што и се најавуваше, денеска тоа го потврдија од клубот, нов менаџер на Тотенхем е Анге Постекоглу.

Постекоглу ќе биде првиот австралиски менаџер во Премиер лигата и со клубот од Лондон ќе има важечки договор до јуни 2027 година.

– Анге носи позитивен менталитет и брз, напаѓачки стил на игра. Тој има силно досие за развој на играчи и разбирање за важноста на врската од академијата – сè што е важно за нашиот клуб. Возбудени сме што Анге ни се придружува додека се подготвуваме за сезоната што следи – вели претседателот на Тотенхем, Даниел Леви.

Постекоглу (57) со Селтик ја освои шкотската Премиер лига, Лига купот и Купот на Шкотска. Го презеде тимот од Глазгов во 2021 година, а пред тоа, меѓу другите, ги предводеше и Јокохама, Мелбурн, Бризбејн, како и репрезентацијата на Австралија.

Тотенхем ја заврши сезоната на осмото место во Премиер лигата и не се пласираше во европските натпреварувања.