После лошите резулати ова лето на европската сцена, фудбалскиот клуб на Шкендија се раздели со досегашниот тренер Ернест Ѓока.

Само три дена подоцна тетовскиот прволигаш и воедно актуелен македонски шампион ја најде замената, а тоа е Бруно Акраповиќ кој потпиша договор на една година, со опција за продолжување на соработката.

53-годишниот босански стратег после пет години повторно ќе ја води Шкендија која ја водеше во сезоната 2015/2016.

– Доаѓам со позитивен впечаток, имам многу пријатели овде кои ги напуштив и кои повторно ги среќавам. Задоволство е да се видат пријатели и плус да се комбинира ова со работата и убавите моменти на фудбалот, задоволството е уште поголемо. Гледам позитивно кон иднината, мислам дека ќе имаме резултати. Мислам дека по елиминацијата од овие последни натпревари треба да ставиме акцент на мотивацијата на играчите, на враќање во ритамот за да можеме да го покажеме квалитетот кој сигурно го имаат и да ја подигнеме мотивацијата на ниво за да можеме да ја започнеме новата сезона со најдобри впечатоци и да можеме да го задоволиме интересот на публиката и интересот на спонзорот – се зборовите на Акраповиќ на клупскиот сајт.

Пред да се врати во Тетово, беше тренер на хрватскиот Сплит и бугарските клубови Локомотив Пловдив и ЦСКА Софија. Со Локомотив Пловдив успеа двапати да го освои Купот на Бугарија, а еднаш и Суперкупот на таа земја.

Новата сезона во Првата македонска лига ќе стартува следниот викенд, а во првото коло Шкендија на 8 август од 17.30 часот ќе му гостува на Тиквеш.