Објавувањето на номинациите за Оскарите беше одложено поради разорните пожари во Лос Анџелес, а соодветно на тоа беше продолжено и времето за гласање за филмовите кои ќе влезат во потесниот круг.

Имено, Академијата за филмски уметности и науки изрази загриженост за многуте членови погодени од пожарите, особено во областа Пацифик Палисадес каде бројни познати личности ги загубија своите домови.

Поради тоа, објавувањето на номинациите за 97. Оскари сега е одложено од 17 јануари на 19 јануари, а гласањето е соодветно продолжено. Извршниот директор Бил Крамер испрати писмо до сите членови на Академијата.

„Почитувани членови на Академијата, сакаме да го изразиме нашето најдлабоко сочувство до погодените од разорните шумски пожари низ Јужна Калифорнија. Многу од нашите членови и колеги од индустријата живеат и работат во областа Лос Анџелес и нашите мисли се со вас“, рече тој на почетокот на своето обраќање.

Со оглед на ситуацијата со пожарот, тие го продолжија периодот на гласање и ги ажурираа информациите за проекциите на потесниот избор за Оскар, а ги поместија подготовките и го затворија Музејот на Академијата.

„Гласањето за 97. номинации за Оскарите започна утринава во 9 часот по локално време. Ќе го продолжиме рокот за гласање за два дена за да им дадеме на членовите повеќе време да го дадат својот глас. Гласањето сега ќе заврши во вторник, 14 јануари. објавувањето на номинациите за Оскар ќе биде поместено од петок во недела, 19 јануари“; објасни тој и додаде дека наскоро ќе објави дополнителни информации.

Проекцијата на меѓународниот игран филм во потесниот избор што требаше да се одржи вечерва во Лос Анџелес ќе биде одложена за друг ден од неделата.

Делови од Лос Анџелес се загрозени од шумски пожари од вторник наутро. Најмалку 30.000 луѓе беа евакуирани, меѓу кои и бројни познати личности. Пет лица загинаа како последица на шумски пожари. Досега изгореа повеќе од 15.000 хектари и 1.100 објекти.